Mar 12 | MHL | STEP | Aria Yeesus arekin opora feenap wia iromak, “Mua oko wain piita onap nomoniw pika warikak. Ne eruwa kuak, ikoka wain makena neeke wuap ititap eka urupeya aawikuan. Ne iinan koora pun kuak. Onap-puap mua oko wapena-pa wia wuap-puomami owow oko epasia ikiwok.

Mark 12

Wain piita urufow mua arekin opora-ke

(Matiu 21.33-46, Luk 20.9-19)

1 Aria Yeesus arekin opora feenap wia iromak, “Mua oko wain piita onap nomoniw pika warikak. Ne eruwa kuak, ikoka wain makena neeke wuap ititap eka urupeya aawikuan. Ne iinan koora pun kuak. Onap-puap mua oko wapena-pa wia wuap-puomami owow oko epasia ikiwok. 2 Nan ikok wain makena aawow saana-pa ona uuwow mua oko sesekak, wain makena-ko wiar aawep pekapominok naep. O iwap fuuneya wi teeria nain-ke opap aruf-iraparep oram sesekiwkin kirep ikiwok.

4 Ne mua oko sesekak. Ne os pun naapiw onamik, ikiwosa wiar fookami emina ururowami oram sesekiwkin ikiwok. 5 Ne nainiw oko sesekak. Nain iiwawun ifakimemik. Ne mua unowa naap wia sesekam-ikua. Wi nain pun papako wia aruf-iraparemik ne papako iiwawun wia ifakimemik.

6 Ne aria mua nain mua kuisow ona muuka sesekowa ikua. Muuka kuisow nain senam kookaliya, nain sesekak. Kema naap maek, ‘Ikoka muuka efar urufap ekima opikuan.’ Kema naap wuap muuka sesekeya ikiwok. 7 Ikiwep fuuneya urufap wi-wieniw maemik, ‘Nee, ona muuka nanek. Ikoka os-ke wiawi epa wiar aawinon. Arika, ifakimikua. Ne miiwa ne maa onoma is-ke wiar aawiyen!’ 8 Naap maep muuka nain opap ifakimemik. Ne sawi napuma mufep pikip pika okaiwi-pa wafuramik.

9 Aria ikoka miiw onoma nain ekapemi kamenap wia oninon? Ni kema suuweka. Ikoka ikiwep wi teeria nain wia ifakimurumep manina nain mua papako wapena-pa wiar wuinon.”

10 Ne nainiw wia maakek, “Mua Maneka opora siisimep-puamik fain-ko me urufaman-i? Feenap,

‘Poka iiriw koora kuow mua-ke samora-ke naep iiraremik. Aakisa poka nain-keriw umua poka arep ikua. 11 Maa nain Mua Maneka-ke naap oneya anirak. Ne i urufap soranep kakaemik.’”
(Someka 118.22-23)

12 Aria wi nain miimap furewamik, i yia maek, naap maemi opu naep onamik-na me pepek. Mua unowa taanep ikaiwkin wi keker opamik. Naapeya kiiriw kirep ikiwemik.

Siisar takis maamuma wiowa nain Yeesus nokaremik

(Matiu 22.15-22, Luk 20.20-26)

13 Aria naap ikok wi Farisi ne wi Erot teeria-ke wiena teeria mua papako wia sesekamik. Ikip Yeesus nokariwkin opora samoreya-na opora-pa wuau naep. Wi ikiwep Yeesus akimami nokaremik, “Somek mua, i nefa amisaremik. No opor makena main. No mua-ko me wia keker opin. I mua yia mekawap me aakunin, weetak, opora me kiri-kiripin. No Mua Maneka opora ifana wiarin nain era makena ookin. Aria aakisa kamenap main? Rom saria maneka Siisar takis wuowa yia maakek nain wuiyen-na Moses sira wuomakek nain puukiyen-i e weetak?” Naap nokaremik.

15 Ne wi wadol sira iiriw wiar amisarek. Naapeya wia maakek, “Ni moram opora-pa korininok naep efa nokareman? Maamuma kuisow-ko yiiwkin niar urufinen.” 16 Ne iwiwkin urufap opap ikok wia nokarek, “Maamuma fain mua naarew kukusa ne unuma-ke wiar ikua?” Ne maemik, “Siisar kukusa-ke.”

17 Naeya wia maakek, “Naapeya-na Siisar maamuma nain ona iweka, ne maa mauwa Mua Maneka wiarik, nain kakeniw naap iweka.” Naap maeya miimap soranep opaimika tenemik.

Mua umep iikirowa opora nain Yeesus nokaremik

(Matiu 22.23-33, Luk 20.27-40)

18 Aria wi Sadusi teeria-ke maimik, mua umimik nain ikoka me iikirikuan. Naapeya wi ekapep Yeesus akimami nokaremik, 19 “Somek mua, sira iiriw Moses wuak nain feenap yia siisimep-puomak, ‘Mua oko emeria aawep muuka marew ikok umeya-na wiamun-ke apura nain eliw wiar aawep ona weepe muuka wiipa wia imenominok.’

20 Aria kaka kuisow nain mua ikur okaiwi-pa erup ikemik ne iperowa-ke kiikiriw emeria aawok. Ne muuka wiipa me imenowa ikok umok. Umeya wiamun o ookap onarek nain-ke apura wiar aawok. Ne os pun muuka marew ikok umok. Ne kiiriw oko-ke apura nain aawok nain pun naap ikok umok. Ne teeria nainiw akena emeria kuisow nain aawep umomakemik, muuka-ko me imenamik. Ne naap ikok apura nain pun umok. 23 Teeria kuisow nainiw emeria kuisow, ne ikoka wi iikirow epa-pa mua naarew emeria wiar ikainon?”

24 Ne Yeesus-ke wia maakek, “Ni Mua Maneka opora nain urufap kemena baliwep me amisareman, ne ona kekanowa pun me wiar amisareman. Naapeya maa amisarowa saarik opora aakuniman. 25 Wiimar iikirow epa-pa wi emeria mua wi ensel saarik ikaikuan. Wi muewowa marew. 26 Aria wi umep iikirowa nain Moses opora siisimep-puak nain me wiar urufaman-i? Iiriw nomokow gelemuta wilinem-ikaiya nan Mua Maneka-ke Moses maakek, ‘Abraham, Aisak ne Yekop wi wiam arow, nain yo wiena Mua Maneka-ke.’ 27 Makena, wi umemik nain Mua Maneka wia urufam-ikaiya. Naapeya wi wiimar iikirowa wiar ikainon. Naapeya ni pepek me maeman.”

Sira maneka Mua Maneka-ke wuak

(Matiu 22.34-40, Luk 10.25-28)

28 Aria wi uuwunem-ikaiwkin sira amis mua oko ekapok. Yeesus opora baliwep akena wia kiripam-ikomaya miimap nokarek, “Nee, Moses sira wuomakek nain sira kain-ke manek akena?” 29 Ne Yeesus-ke maek, “Sira manek akena nain feenap, ‘Ni Isrel miimeka, yiena Maneka Mua Maneka waisow. 30 Yiena Maneka Mua Maneka kookaleka, mia, kema, uroma, woosa iiwawun manekiw kookaleka. 31 Ne sira kekanowa oko feenap, emeria mua oko wia kookaleka, niena niam kookaliman naap. Sira unowa nain-ke sira erup fain me nomakek.’” Naap wia maakek.

32 Ne sira amis mua nain-ke maakek, “Somek mua. Makena, no pepek maen. Yiena Maneka waisow, Mua Maneka oko-ko me ikua. 33 I yiena kema-pa o kookalikua, yiena woosa-pa, ne o uuwowa kekanowa uuwomikua. I emeria mua oko wia kookalikua, yiena yiam kookalimik naap. Sira erup fain manek akena, maa eneka ne maa papako-pa Mua Maneka patirimik nain iiwawun nomakek.”

34 Mua nain opora pepek akena kiripeya Yeesus-ke maakek, “No Mua Maneka teeria-pa wiar ikowa mamaiya aren.” Naap maeya wi keker opap mua kuisow nainiw Yeesus me nokaremik.

Yeesus wia nokarek, Krais naareke

(Matiu 22.41-46, Luk 20.41-44)

35 Yeesus tempel koora pika maneka-pa ikok suule wia onam-ikua. Ne wia nokarek, “Wi sira amis mua-ke maimik, ‘Krais Dewit nembesir-ke,’ nain kamenap? 36 Iiriw Ewar Eliwa-ke Dewit kema iweya maek,

‘Mua Maneka-ke yena Maneka maakek, “No yo aken ekeria-pa efar pokap ikaeya wi iiwua iiwawun no kepur tepak-pa wia wuinen.” ’
(Someka 110.1)

37 Dewit ona nembesir nain ‘Yena Maneka-ke’ naek. Ona nembesir nain kamenap ona Maneka wiar ikainon?” Emeria mua unowiya Yeesus opora wiar miimap ifana afililamik.

Yeesus wi sira amis mua sira samo-samora ariman wia wuak

(Matiu 23.1-36, Luk 11.37-54 ne 20.45-47)

38 Aria Yeesus opora wia maakemi maek, “Ni sira amis mua wia uru-urufap. Wi mia suuwowa maa-maala wuap soomarem-miawimik. Ne fiirimow epa-pa mua tetera-ke yia naemi baliwep yia ane-puukuk naep kookalimik. Ne lotu koora-pa epa eliwa ne pokow eliwa-pa pokowa kookalimik, ne maa enow epa-pa wi miimowa-pa pokowa kookalimik. Ne emer apura wia peeskimemi maa unowa wiar ifemakimik, ne wadolalemi Mua Maneka farowa maala mufimik. Wi wadol sira nain-pa ikoka pina manek akena aawikuan.”

Emer apura Mua Maneka naep maamuma iiwawun wuak

(Luk 21.1-4)

41 Ne Yeesus nan ikok ikip wi maamuma wuimik nain mamaiya-pa pokak. Pokap ikok mua papako tempel koora uuwowa maamuma wuam-ikaiwkin wia urufam-ikua. Wi maamuma mua-ke maamuma mane-maneka wuam-ikemik. 42 Ne emer apura oko-ke ekapep maamuma gelemuta erup wuak, maamuma oka erup pepek.

43 Aria Yeesus-ke naap urufap ona teeria wia fareya ekapiwkin wia maakek, “Wi maamuma mua-ke maamuma maneka wuamik, nain wiena osena wiar ikua nain wuamik. Ne apura fain maa unowa weetak. O maamuma muuta wiar ikua nain iiwawun fan wuak. Makena nia maakiyem, o wuak nain Mua Maneka mokoka-pa manek akena wuak, ne wi mua papako maamuma wuamik nain maneka wia.”